Taʼlim sifatini nazorat qilish davlat
inspeksiyasida Malayziyaning “Binary” menejment va tadbirkorlik universiteti
rahbariyati bilan uchrashuv boʻlib oʻtdi.
Muhokamalar
davomida universitetning Xorazm filialini tashkil etish bo‘yicha amalga
oshirilayotgan ishlar va Taʼlim inspeksiyasining o‘rganish natijalari, mazkur
nodavlat oliy taʼlim tashkilotiga litsenziyani rasmiylashtirish hamda
mamlakatimizda universitet tomonidan berilgan diplomlarni tan olish bilan
bog‘liq qator masalalar yuzasidan atroflicha fikr almashildi.
Uchrashuv
avvalida Taʼlim inspeksiyasi boshlig‘i mamlakatimizda nodavlat oliy taʼlim
tashkilotlari sonini oshirish bo‘yicha amalga oshirilayotgan ishlar va bu
yo‘nalishdagi davlat talablari haqida maʼlumot berdi. – So‘nggi yillarda
oliy taʼlim tizimini takomillashtirish bo‘yicha amalga oshirilayotgan
islohotlar natijasida nodavlat oliy taʼlim tashkilotlari soni muntazam oshib
bormoqda. Oliy taʼlim tizimini 2030 yilgacha rivojlantirish konsepsiyasida har
bir hududda nodavlat oliy taʼlim muassasalari faoliyatini yo‘lga qo‘yish
bo‘yicha aniq vazifalar belgilab berilgan.
Xorazm viloyatida ham xorijiy investorlar
tomonidan mana shunday taʼlim maskani ochilayotgani biz uchun quvonarli voqea,
– dedi Taʼlim inspeksiyasi boshlig‘i Ulug‘bek Tashkenbayev. – Mamlakatimizda
aholi soniga nisbatan yoshlarning ulushi oshib borayotganini hisobga olib,
taʼkidlashim lozimki, Xorazm viloyatida mana shunday nodavlat oliy taʼlim
tashkilotlari filiallari sonining oshib borishidan biz ham manfaatdormiz. Umid
qilamizki, “Binary” universiteti ham yurtimizdagi yetakchi oliy taʼlim
muassasalari qatorida mehnat bozoriga salohiyatli va raqobatbordosh kadrlarni
yetkazib berishga xizmat qiladi. O‘z navbatida “Binary” menejment va
tadbirkorlik universiteti asoschisi va rektori Jozef Adaykalam Taʼlim
inspeksiyasi mutasaddilariga samimiy qabul uchun minnatdorchilik bildirar ekan,
universitet tarixi va bugungi kundagi faoliyati va istiqboldagi rejalarga
to‘xtalib o‘tdi.
– Men oldin ham mamlakatingizda bir necha
marotaba bo‘lganman. O‘tkazilgan saylov jarayonlarida kuzatuvchi sifatida
qatnashib ko‘rdimki, O‘zbekiston kadrlar tayyorlash bo‘yicha ulkan salohiyatga
ega. Shundan kelib chiqqan holda, biz uchun mamlakatingiz oliy taʼlim tizimiga
investitsiya kiritish qiziqarli bo‘ldi. “Binary” universitetining o‘quv
dasturlari Buyuk Britaniya, AQSH, Avstraliya kabi mamlakatlar standartlari
asosida shakllantirilganligini taʼkidlashim lozim, – dedi “Binary” menejment va
tadbirkorlik universiteti rektori. – Bundan tashqari, bakalavr va magistratura
bosqichi bitiruvchilariga diplom bilan birgalikda AQSHning Milliy standartlashtirish
instutiti tomonidan akkreditatsiyalangan ISP sertifikati ham taqdim etiladi. Bu
esa ularga mehnat bozorida o‘z o‘rinlarini topishlari uchun katta ustunlik
beradi. Shuningdek, bizda bitiruvchilar kasb bilan birgalikda, tadbirkorlikka
ham tayyorlab boriladi. Aynan mana shunday yondashuvlar asosida bugungi kunda
bitiruvchilarimizning bandlik ko‘rsatkichlari o‘rtacha 96 foizni tashkil
etmoqda.
Muzokaralar yakunida universitetda taʼlim sifati
va samaradorligini oshirish bo‘yicha ikki tomonlama hamkorlik aloqalarini davom
ettirishga va belgilangan taʼlim faoliyatini yo‘lga qo‘yish bo‘yicha yakuniy
hujjatlar taqdim etilgach, mazkur oliygohga o‘rnatilgan tartibda litsenziya
rasmiylashtirilishiga kelishib olindi.
Maʼlumot uchun, Malayziyaning “Binary” menejment
va tadbirkorlik universiteti, 1984 yilda tashkil qilingan bo‘lib, universitetda
60 dan ortiq mamlakat talabalari tahsil oladi. 5 ta tadqiqot markazlari
faoliyat yuritadi. Taʼlim muassasasining bakalavr bosiqichida 5 ta,
magistratura bosqichida 11 ta va doktorantura bosqichida 3 ta yo‘nalish mavjud.
Universitetning Urganch shahridagi filiali 2020
yil 17 sentyabrda tashkil etilgan bo‘lib, mazkur taʼlim muassasasida 124 nafar
talaba tahsil olmoqda.
Manba: https://www.gov.uz/uz/news/
