Milliy Ilmiy Portali

Oʻzbekiston Respublikasi Prezidentining 2025-yil 30-yanvardagi “Oʻzbekiston – 2030” strategiyasini “Atrof-muhitni asrash va “yashil iqtisodiyot” yilida amalga oshirishga oid davlat dasturi toʻgʻrisida” PF-16-son farmoni 1-ilova 9-maqsadida keltirilgan topshiriqlarda belgilangan vazifalar bo‘yicha matematika, biologiya, kimyo, geologiya, fizika, epidemiologiya, seysmologiya, biologik xilma-xillik, muhandislik fan yoʻnalishlarida ilmiy yechimga qaratilgan ilmiy faoliyatga oid davlat maqsadli dasturlar doirasida bajariladigan fundamental tadqiqotlar tanlovi eʼlon qilinmoqda.

Mazkur tanlov ilmiy-tadqiqot ishlariga davlat buyurtmasi talablarga muvofiq oʻtkaziladi hamda bajarilishi toʻrt yilga moʻljallangan fundamental loyihalar quyidagi fan yoʻnalishlari boʻyicha eʼlon qilinadi:

1. “Yer toʻgʻrisidagi fanlar” yoʻnalishi boʻyicha

1.1. Orol dengizi o‘rnida innovatsion geokimyoviy usullar yordamida uglevodorodga istiqbolli yangi qatlamlarni aniqlash

2. “Biologiya va biotexnologiya fanlari” yoʻnalishi boʻyicha

2.1 Aconitum zeravschanicum va Delphinium semibarbatum dorivor oʻsimliklardan ajratilgan endofit zamburugʻlarning ikkilamchi metabolitlarini ajratish, tuzilishini aniqlash va biologik faolligi.

3.“Ekologiya, atrof muhitni muhofaza qilish va iqlim oʻzgarishi” yoʻnalishi boʻyicha

3.1. Tabiiy ekosistemalarda dorivor oʻsimliklar resurslarining qayta tiklanish mexanizmi: aspektlari va muhofaza strategiyasi (Janubiy Oʻzbekiston misolida)

4. “Kimyo, kimyoviy texnologiyalar va nanotexnologiyalar” yoʻnalishi boʻyicha

4.1. Co, Ni, Cu va Zn metallarining polifunksional taʼsirga ega aralash-ligandli koordinatsion birikmalari sintezi, tarkibiy xususiyatlari, reaktivligi hamda ularning biologik xususiyatlarining ilmiy asoslari

5. “Matematika, fizika, mexanika fanlari” yoʻnalishi boʻyicha

5.1. Neytron va gamma nurlanishining istiqbolli reaktor materiallarining elektrofizik, issiqlik, strukturaviy va mustahkamlik xususiyatlariga taʼsiri, yadro yoqilgʻisining yangi turlari boʻyicha tadqiqotlar.

5.2. Bogolyubov-Born-Green-Kirkvood-Yvon kvant kinetik tenglamalar zanjirining  yechimini aniqlash  va uning kriptografiyada vaqtga bog‘liq axborotlar uchun qo‘llash.

6. “Texnika fanlari” yoʻnalishi boʻyicha

6.1. Yagona elektr energetika tizimida elektr energiyasini isteʼmol qilish har soatlik rejimlarining qonuniyatlari

6.2. Tog‘ yonbag‘irlaridagi geologik ofatlarning multiriskini baholash va geologik jarayonlarni barvaqt aniqlashda chuqur mashinali o‘qitish uchun ko‘p parametrli ma’lumotlarni tahlil qilishni intellektual tizimining ilmiy asoslari

7.  “Tibbiyot fanlari” yoʻnalishi boʻyicha

7.1. Oʻtkir osti sklerozlanuvchi panensefalit kasalligiga uchragan bemorlarni  erta tashxislash va davo choralari, etiologik sabablar, onalarda immunitet tarangligini, genetik omillar va profilaktika choralarining ilmiy asoslarini tadqiq qilish.

Loyiha taqdim qilinganda loyiha rahbari oʻz loyihasi tadqiqot yoʻnalishidan kelib chiqib vazirlik huzuridagi Ilmiy-texnik kengash yoʻnalishini tanlashi va shu yoʻnalish boʻyicha taqdim qilishi lozim.

Tanlovga taqdim etiladigan ilmiy loyihalar Davlat ilmiy dasturlarining yagona intellektual elektron platformasi (loyiha.ilmiy.uz) orqali 2025-yilning 18-sentabrga qadar faqat elektron shaklda qabul qilinadi.

Tanlov shartlari.

1. Loyihani amalga oshirish bo‘yicha ilmiy jamoaning oʻrtacha yoshi 45 yoshdan oshmasligi lozim. Ilmiy jamoada yosh olimlar va iqtidorli talabalar (shu jumladan, magistratura talabalari) ishtirok etishi maqsadga muvofiq.
2. Tanlovda ilmiy-tadqiqotlar oʻtkazish uchun imkoniyati va salohiyati mavjud ilmiy faoliyat subyektlari ishtirok etishi mumkin. Ilmiy faoliyat asosiy faoliyat turiga kirmaydigan tashkilotlar tomonidan taqdim etilgan loyihalar tanlovdan chetlashtiriladi.Loyiha hamrahbari sifatida xorijiy oliy taʼlim va ilmiy-tadqiqot tashkilotlarida faoliyat koʻrsatayotgan va loyiha mavzusi yoʻnalishida muhim natijalarga erishgan, “Scopus” va “Web of Science” xalqaro ilmiy maʼlumotlar bazalarida “Hirsh” indeksi 5 va undan yuqori boʻlgan yetakchi olimlar jalb qilinadi.
3. Loyiha rahbari tomonidan tanlovga faqat bitta loyiha taqdim etilishi mumkin. Bir vaqtning oʻzida bir turdagi ikkita loyihaga rahbar boʻlishiga yoʻl qoʻyilmaydi va ushbu holatga olib kelishi mumkin boʻlgan loyihalar qabul qilinmaydi.
4. Ilmiy loyiha Davlat ilmiy dasturlarining yagona intellektual elektron platformasi (loyiha.ilmiy.uz) orqali elektron platformaga yuklanishi lozim:
5. Taqdim etilgan loyihalardagi maʼlumotlarning haqqoniyligi va ishonchliligi hamda tanlov gʻoliblari tomonidan ilmiy-texnik loyihalarning natijadorligi, tanlov dasturlari vazifalarida belgilangan, kutilayotgan natijalarni toʻla va oʻz vaqtida sifatli bajarilishiga ilmiy loyiha rahbarlari, ilmiy loyihani bajaruvchi tashkilot rahbarlari va tegishli yuqori turuvchi tashkilotlarning masʼul xodimlari javobgar hisoblanadilar.
6. Taqdim etilgan loyihada keltirilgan ilmiy yangilik, nou-xau va gʻoyalarni ekspertiza jarayonlarida ochiq muhokamaga qoʻyishning maqsadga muvofiqligi toʻgʻrisida ijrochi tashkilot vakolatli tuzilmasining (xizmatining) xulosasi loyihaga ilova qilinishi lozim.
7. Tanlovga taqdim etiladigan loyihaning umumiy moliyalashtirish hajmi va bajarish muddatlari, eʼlon qilinadigan loyiha mavzusining matniga muvofiq boʻlishi shart.
8. Tanlovda belgilangan yoʻnalishlarda bajarilishi 4 (toʻrt) yilga moʻljallangan fundamental tadqiqotlarning har biriga bazaviy hisoblash miqdorining 12 000 barobaridan oshmagan holda mablagʻ ajratiladi.

Eslatma: Tanlovga taqdim etilgan loyihalarning har bir bosqichda koʻrib chiqish natijalari toʻgʻrisidagi maʼlumotlar loyiha rahbarlarining Davlat ilmiy dasturlarining yagona intellektual elektron platformasidagi (loyiha.ilmiy.uz) shaxsiy kabinetlarida taqdim etib boriladi.

Tanlovga taqdim etiladigan ilmiy loyihalar loyiha rahbarining ilmiy va innovatsion faoliyat bilan shugʻullanuvchi jismoniy shaxslarni identifikatsiya qilish tizimida (id.ilmiy.uz) roʻyxatdan oʻtgan shaxsiy kabineti orqali topshiriladi va ijrochi tashkilot masʼul rahbari tomonidan tasdiqlanadi.

Ilmiy loyihalarni shakllantirish bilan bogʻliq masalalar boʻyicha Innovatsion rivojlanish agentligi masʼul xodimlari: +99871 203-32-23 (425, 413, 246)