Milliy Ilmiy Portali

Doktorantura haqida

Oliy ta’limdan keyingi ta’lim — doktorlik dissertatsiyasini tayyorlash va himoya qilish maqsadida mutaxassislikni chuqur o‘rganishni va ilmiy izlanishlar olib borishni nazarda tutadigan tayanch doktorantura, doktorantura va mustaqil izlanuvchanlik asosida ilmiy darajaga ega ilmiy va ilmiy-pedagogik kadrlar tayyorlashni ta’minlaydigan ta’lim turi;

oliy ta’limdan keyingi ta’lim instituti — ilmiy tashkilot yoki ta’lim muassasalarida tayanch doktorantura, doktorantura yoki mustaqil izlanuvchilik shakllaridagi oliy ta’limdan keyingi ta’limni amalga oshirish tizimi;

stajyor-tadqiqotchilik — ishlab chiqarishdan ajralgan holda tegishli ixtisoslik bo‘yicha ilmiy va ilmiy-ijodiy izlanishlarni olib borish va falsafa doktori (PhD) ilmiy darajasini olish uchun izlanuvchini tayyorlash shakli;

tayanch doktorantura — falsafa doktori (Doctor of Philosophy (PhD) ilmiy darajasiga da’vogar izlanuvchilar uchun ishlab chiqarishdan ajralgan holda tashkil etiladigan oliy malakali ilmiy va ilmiy-pedagog kadrlar ixtisosligi bo‘yicha oliy ta’limdan keyingi ta’lim shakli;

doktorantura — fan doktori (Doctor of Science (DSc) ilmiy darajasiga da’vogar izlanuvchilar uchun ishlab chiqarishdan ajralgan holda tashkil etiladigan oliy malakali ilmiy va ilmiy-pedagog kadrlar ixtisosligi bo‘yicha oliy ta’limdan keyingi ta’lim shakli;

mustaqil izlanuvchilik — falsafa doktori (Doctor of Philosophy (PhD) yoki fan doktori (Doctor of Science (DSc) ilmiy darajalariga da’vogar izlanuvchilar uchun ishlab chiqarishdan ajralmagan holda tashkil etiladigan oliy malakali ilmiy va ilmiy-pedagog kadrlar ixtisosligi bo‘yicha oliy ta’limdan keyingi ta’lim shakli;

stajyor-tadqiqotchi — ilmiy tashkilot yoki ta’lim muassasalariga stajyor-tadqiqotchilikka belgilangan tartibda qabul qilingan shaxs;

doktorant — ilmiy tashkilot yoki ta’lim muassasalariga tayanch doktorantura yoki doktoranturaga belgilangan tartibda qabul qilingan shaxs;

mustaqil izlanuvchi — ilmiy tashkilot yoki ta’lim muassasalariga mustaqil izlanuvchilikka belgilangan tartibda qabul qilingan shaxs;

izlanuvchi — falsafa doktori (PhD) yoki fan doktori (DSc) ilmiy darajasini olish uchun doktorlik dissertatsiyasini tayyorlayotgan shaxs.

O‘zbekiston Respublikasi Innovatsion rivojlanish vazirligi tomonidan 2019 yilda oliy ta’limdan keyingi ta’lim tizimida qabul kvotalari bo‘yicha buyurtmalarni shakllantirish, hujjatlarni topshirish va ro‘yxatga olish, faoliyat samaradorligi monitoringini olib borishni Oliy ta’limdan keyingi ta’limni muvofiqlashtirishning yagona elektron tizimi (phd.mininnovation.uz) sinov tariqasida amalga oshirilmoqda.

Izlanuvchilarda mavjud muammo va qiyinchiliklarini hal etish maqsadida:

- vazirlik, idoralar va OTM, ilmiy tashkilotlarning mas’ul xodimlari orasida tezkor axborot almashish va maslahat berib borish maqsadida telegram guruh (Doktorantura online) tashkil qilindi va doimiy maslahatlar berib borish yo‘lga qo‘yildi;

- Oliy ta’limdan keyingi ta’lim institutiga kirish istagida bo‘lganlar uchun t.me/doktoranturatalabgor hamda tizim yuzasidan taklif va mulohazalarga t.me/test_phd telegram guruhlari tashkil qilindi va doktorantlarning savollariga faol ravishda javoblar berib borilmoqda.

Stajyor-tadqiqotchilik, tayanch doktorantura, mustaqil izlanuvchilik (PhD)ga o'qishga talabgorlar quyidagi hujjatlarni taqdim etadilar 

• Ariza
• Qisqacha biografik ma'lumot (ma'lumotnoma - namuna 3.5 shakl bo'yicha o'zbekcha va ruscha shaklda)
• Mehnat daftarchasining belgilangan tartibda tasdiqlangan nusxasi (ishlayotgan talabgorlar uchun)
• Oliy ta'lim muassasasi magistraturasi diplomi yoki klinik ordinaturani tugatganligi (tibbiyot fanlari uchun), oliy ma'lumot (mutaxassislik dasturlari bo'yicha) to'g'risida diplom nusxasi
• Nashr etilgan ilmiy ishlar ro'yxati, shuningdek ularning nusxalari (kamida 1 ta maqola va 2 ta tezis)
• Ish joyidan tavsifnoma (Mustaqil izlanuvchilar uchun)
• Pasport nusxasi
• O'zbekiston Respublikasi Prezidenti Davlat stipendiyasi hujjat nusxasi (mavjud bo'lsa)
• Xorijiy tilni bilish darajasini belgilovchi CEFR tizimi bo‘yicha B2 (IELTS 6) darajasidan past bo‘lmagan amaldagi milliy yoki xalqaro sertifikat (mavjud bo'lsa)

Barcha hujjatlar PDF shaklida tayyorlanib Oliy ta'limdan keyingi ta'limni muvofiqlashtiruvchi Yagona elektron tizimi orqali ro'yxatdan o'tgan holda yuboriladi

Doktorantura, mustaqil izlanuvchilik (DSc)ga o'qishga talabgorlar quyidagi hujjatlarni taqdim etadilar

• Ariza
• Qisqacha biografik ma’lumot (ma'lumotnoma, namuna bo'yicha 3.5 shakl, o'zbekcha va ruscha shaklda)
• Mehnat daftarchasining belgilangan tartibda tasdiqlangan nusxasi (ishlayotgan talabgorlar uchun)
• Oliy ma’lumot, fan nomzodi yoxud falsafa doktori (PhD) yoki xorijiy davlatlarda unga tenglashtirilgan ilmiy darajaga ega bo'lganligi to'g'risidagi diplom nusxasi
• Tadqiqot mavzusi bo'yicha ilmiy ma’ruza va fan doktori (DSc) ilmiy darajasini olish uchun tayyorlangan doktorlik dissertatsiyasi rejasining batafsil loyihasi
• Nashr etilgan ilmiy ishlar ro'yxati, shuningdek ularning nusxalari (kamida 3 ta maqola va 2 ta tezis)
• Ish joyidan tavsifnoma (Mustaqil izlanuvchilar uchun)
• Pasport nusxasi
• Ilmiy yutuqlari (O'zbekiston Respublikasi Prezidenti Davlat stipendiyasi hujjat nusxasi)

Barcha hujjatlar PDF shaklida tayyorlanib Oliy ta'limdan keyingi ta'limni muvofiqlashtiruvchi Yagona elektron tizimi orqali ro'yxatdan o'tgan holda yuboriladi.