Milliy Ilmiy Portali

O‘zbekiston Respublikasi Vazirlar Mahkamasining 2020-yil 22-maydagi 313-son qaroriga muvofiq “Andijon Yoshlar Texnoparki“ MChJ tashkil etilgan. Andijon Yoshlar Texnoparki 2021-yilning sentabr oyidan boshlab faoliyat yuritib kelmoqda. Andijon viloyatining Andijon shahrida joylashgan ushbu texnopark yoshlar, talabalar, olimlar hamda tadbirkorlik subyektlarining o‘z loyihalarini va g'oyalarini amalga oshirish va rivojlantirish uchun barcha sharoitlarga ega, zamon talablariga javob beruvchi eng so'ngi rusumdagi jihozlangan o‘quv va ishlab chiqarish texnoparki hisoblanadi.

“Andijon Yoshlar texnoparki” yiliga 560 nafar axborot-kommunikatsiya texnologiyalari sohaga qiziquvchi yoshlarni 5 ta “Web-dasturlash”, “Robototexnika”, “3D modellashtirish”, Grafik dizayn va Web-dizayn yo‘nalishlarida o‘qitish imkoniga ega.

Shuningdek, korxona va tashkilotlarda ishlovchi xodimlarni axborot-kommunikatsiya texnologiyalari sohasi bo‘yicha malakalari oshiriladi. O‘quvchilar uchun barcha shart-sharoitlar yaratilgan. Bepul internet zamonaviy kompyuter to‘plamlari, 3D printerlar, Ardiuno va lego qurilmalari mavjud.

Tashkilotning vazifalari:

Hududlarda “Yoshlar akademiyasi”ning faoliyatini rivojlantirish, mahalliy ijro etuvchi hokimiyat organlari, ta’lim muassasalari, ilmiy tashkilotlar va hududlardagi texnologiyalar va innovatsiyalarni qo‘llab-quvvatlash markazlari bilan hamkorlikda yoshlarni intellektual, ilmiy va ijodiy salohiyatini oshirish;

Hududlarda yoshlarning tahliliy fikrlash, ularni ilmiy tadqiqot va innovatsion faoliyatga keng jalb etish, iqtidorli, tashabbuskor yoshlarning o‘z intellektual salohiyatini namoyon qilishi va ijtimoiy moslashuvi uchun zarur sharoitlar yaratish;

Yoshlarning “startap” loyihalarini rivojlantirish va ularni amalga oshirish uchun yagona maydon tashkil etish orqali hududlarning innovatsion salohiyatini oshirish;

Zamonaviy talablarga javob beradigan malakali kadrlarni tayyorlash, shuningdek, hududlarni sifatli, yuqori texnologiyali mahsulotlar va xizmatlar bilan ta’minlash maqsadida ilm-fan, ta’lim va ishlab chiqarish integratsiyasini chuqurlashtirish;

Iqtidorli yoshlarni rivojlangan xorijiy mamlakatlarning nufuzli ilmiy markazlari, universitetlari, texnoparklari va ishlab chiqarish tashkilotlarida malaka oshirishlariga ko‘maklashish;

Yetakchi kompaniyalar vakillari, malakali mutaxassislar va ekspertlar ishtirokida treninglar va master-klasslarni, shuningdek, yoshlarda amaliy ko‘nikmalarni shakllantirish va ishlab chiqaruvchilar bilan innovatsion aloqalarni yo‘lga qo‘yish maqsadida ilmiy-texnik konferensiya, seminar, o‘quv kurslari va treninglar tashkil etish;

Iqtidorli yoshlar tomonidan taklif etilgan dolzarb yo‘nalishlar bo‘yicha loyihalarni saralash hamda O‘zbekiston Respublikasi Innovatsion rivojlanish agentligi tomonidan mavzuga oid grantlar berish yuzasidan e’lon qilib boriladigan tanlovlarga yo‘naltirish;

Ilmiy-texnik, innovatsion hamda “startap” loyihalarini amaliyotga joriy etish maqsadida oliy ta’lim muassasalarining ilmiy xodimlari, o‘qituvchi-professor va talabalarini jalb qilish.

Tashkilotning funksiyalari:

Tadqiqotlar va ishlanmalarni tijoratlashtirishga mo‘ljallangan kichik innovatsion korxonalarini tashkil etish va rivojlantirishga, shuningdek boshlang‘ich tadbirkorlarga innovatsion loyihalarini amalga oshirishda ko‘maklashish;

Iqtidorli yoshlar tomonidan taklif etilgan dolzarb yo‘nalishlar bo‘yicha saralangan loyihalarni mavzuga oid grantlar berish yuzasidan e’lon qilib boriladigan tanlovlarda ishtirok etishida ko‘maklashish va qo‘llab-quvvatlash;

Oliy ta’lim muassasalarining professor-o‘qituvchilar tarkibi va talabalarini, ilmiy tashkilotlar xodimlarini, alohida olimlar va mutaxassislarni tadbirkorlik faoliyatiga faol jalb qilish, ularning g‘oya va loyihalarini amalga oshirishga ko‘maklashish;

Yoshlar texnoparki rezidentlariga keng ko‘lamli xizmatlar ko‘rsatish, shuningdek Yoshlar texnoparki rezidentlariga ilmiy-texnik tadqiqotlar, ishlanmalar va ixtirolar natijalarini ilgari surishda ko‘maklashish;

Innovatsion menedjmenti va innovatsiyalar marketingi sohasida tadbirkorlar va mutaxassislarni o‘qitishni va tayyorlashni tashkil etish, ularning kasbiy, huquqiy, iqtisodiy va boshqaruv bilimlari darajasini oshirish;

Yoshlarning startap loyihalarini rivojlantirish va amalga oshirish uchun mo‘ljallangan yagona maydonni tashkil etish;

Ilmtalab texnologiyalar va raqobatbardoshli mahsulotlar yaratishga yo‘naltirilgan ilmiy-texnik loyihalar va dasturlar ishlab chiqilishiga va ularning amalga oshirilishiga ko‘maklashish;

Qonun hujjatlariga muvofiq nufuzli ilmiy markazlar, universitetlar, texnoparklar va ishlab chiqarish tashkilotlar bilan xalqaro ilmiy-texnik hamkorlikni tashkil etish va amalga oshirish;

Tashkilot tomonidan amalga oshirilgan ishlar:

Bugungi kunda Andijon Yoshlar Texnoparki tomonidan iqtidorli yoshlarni qo‘llab-quvvatlash, ularni innovatsion tadbirkorlik faoliyatiga keng jalb qilish, tashabbuskor yoshlar tomonidan taklif qilingan startap loyihalarni rivojlantirish va ularni prototiplarini yaratish hamda ishlab chiqarishda amalga oshirish bo‘yicha bir qator amaliy ishlar va loyihalar amalga oshirilmoqda.

“INNOX” biznes inkubator, “Technoways” yoshlar biznes inkubatgori, “Zamonaviy kasblarni bepul o‘rganing”, “Business Management School”, “G‘oyadan startapgacha”, “Innovatorlar kuni” va “Biznes marafon” loyihalari shular jumlasidandir.

Bugungi kunga qadar, yuqoridagi loyihalarga 10 mingdan ziyod yoshlar qamrab olindi.

Xususan, “INNOX” biznes-inkubator dasturini tashkil etish bo‘yicha tasdiqlangan nizomga muvofiq Andijon Yoshlar Texnoparkida “InnoX” biznes-inkubator dasturi ishga tusharilgan bo‘lib, dastur doirasida 50 dan ortiq targ‘ibot tadbirlari hamda soha mutaxassislari ishtirokida davra suhbatlari o‘tkazildi. O‘tkazilgan targ‘ibot tadbirlarida 7000 mingdan ziyod yoshlar qamrab olindi.

“INNOX” biznes-inkubator dasturi doirasida yoshlar tomonidan 60 ta startap loyihlar shakillantirilib shundan 23 ta startaplar Innovatsion rivojlanish agentligining grant tanlovlariga, 14 ta startaplar xalqaro grantlarga yo‘naltirildi. 2,9 mlrd so‘m qiymatidagi 4 ta startap loyihalar Innovatsion rivojlanish agentligi tomonidan moliyalashtirilgan.

Bundan tashqari, dastur ishtirokchilaridan 1 nafari “Unicorns SCO” xalqaro tanlovida 10 ming AQSh dollari, 1 nafari  “Biznesga birinchi qadam” tanlovida 50 mln so‘m, 8 nafari  “Mirzo Ulug‘bek vorislari” Respublika tanlovining viloyat bosqichida 3,3 mln so‘m, 4 nafari esa Respublika bosqichida g‘oliblikni qo‘lga kiritib 6,6 mln so‘m miqdoridagi pul mablag‘larini qo‘lga kiritdilar. 

Andijon yoshlar texnoparki tomonidan talabalar, yosh olimlar va o‘qituvchilarning ilmiy-tadqiqot ishlari natijalarini ishlab chiqarishga joriy qilish maqsadida xalqaro va mahalliy darajada e’tirof etilgan kompaniyalar, tashkilotlar va mutaxassislar ishtirokida “Biznes inkubator”, “Web-dasturlash”, “Grafik dizayn”, “Robototexnika”, “3D modellashtirish” hamda “Web-dizayn” yo‘nalishlari bo‘yicha 1500 nafar ishtirokchilarni o‘z ichiga olgan 30 dan ortiq mahorat darslari, treninglar, va seminarlar o‘tkazildi.

Robototexnika yo‘nalishi bo‘yicha yoshlar o‘rtasida 10 dan ziyod musobaqalar hamda davra suxbatlari o‘tkazildi.

Zamonaviy talablarga javob beradigan malakali kadrlarni tayyorlash, yoshlarni innovatsion faoliyatga keng jalb etish maqsadida “Zamonaviy kasblarni bepul o‘rganing”loyihasi 5 bor tashkil etildi. Loyiha doirasida 325 nafar yoshlar 5 ta yo‘nalishlardagi zamonaviy kasblarga bepul o‘qitildi.  

Viloyat tashkilotlarini sifatli dasturiy va texnologik mahsulotlarga ehtiyojlari o‘rganib borilmoqda va shu asosida “Tibbiy-ijtimoiy xizmatlari rivojlantirish” boshqarmasi takliflari bo‘yicha nogironligi bo‘lgan va nafaqa yoshidagi shaxslarga, uydan turib zarur bo‘lgan protez buyumlari hamda sog‘lomlashtirish sihatgohlarida dam olish uchun ariza qoldirish, navbatni onlayn kuzatib borish, korrupsiya holatlarini oldini olish maqsadida “N-yordam” hamda nodavlat ta’lim muassasalari hamda respublika Yoshlar texnoparklaridagi o‘quv tizimi faoliyatini avtomatlashtirish maqsadida www.yoshlartexnoparki.uz “CRM” platformalari ishga tushurildi.

Ishlab chiqarish maydonchasida import o‘rnini bosuvchi qoliblarni ishlab chiqarish yo‘lga qo‘yildi. Bugungi kunda xorijdan olib kelinayotgan mayda detallarni mahalliylashtirish bo‘yicha Eron davlatidan olib kelinayotgan 2 xil turdagi detallarni texnopark ishlab chiqarish pavilonida tayyorlash yo‘lga qo‘yildi.

Hozirda, “FabLab” prototiblash labaratoriyasida 30 turdagi tayyor mahsulotlar ishlab chiqarish yo‘lga qo‘yilgan. Bundan tashqari “O‘zAuto-Austem” AJning  horijdan olib kelinayotgan mayda detallarini mahalliylashtirish bo‘yicha hamkorlikda amaliy ishlar olib borilmoqda.

Xususan «Uz-SeMyung Ko» qo‘shma korxonasining   “Damas” va boshqa turdagi avtomobilining butlovchi detalni Andijon Yoshlar Texnoparki “FabLab” prototiplash labaratoriyasida ishlab chiqarish bo‘yicha takliflar olindi.

20 nafar yoshlar Andijon Yoshlar Texnoparkining “FabLab” prototiplash labaratoriyasida payvandlash, tokar ustasi, ChPU uskunasi operatorligi va injener konstruktorlik yo‘nalishlari bo‘yicha tashkil etilgan 3 oylik kasb maktablariga ustoz-shogird shaklida qabul qilindi. kurs yakunida mutaxassislikni tasdiqlovchi sertifikatlar taqdim etiladi.