Milliy Ilmiy Portali

“Spin-off” korxonalari oliy ta’lim muassasalari va ilmiy tashkilotlarda professor o‘qituvchilar, tadqiqotchilar va talabalar tomonidan amalga oshirilgan tadqiqotlar natijasida yaratilgan ilmiy ishlanmalarni tijoratlashtirish hamda sotish uchun drayver vazifasini bajaradi.

Oliy ta’lim muassasalari yoki ilmiy tashkilotlar huzurida tashkil etiladigan  “Spin-off” korxonalar tadqiqotlar natijasida yaratiladigan ilmiy ishlanmalarga asoslangan mahsulotlarni (xizmat) ishlab chiqarish va sotish orqali daromad topish bilan shug‘ullanadi.

“Spin-off” korxonalar olimlar, tadqiqotchilar va talabalarni bozor iqtisodiyoti talablariga mos bo‘lgan ishlanmalar yaratishga qaratilgan tadqiqotlar olib borishlarini rag‘batlantiradi va qo‘llab-quvvatlaydi.

“Spin-off” korxonalar ilmni bozor iqtisodiyotiga integratsiyalashi natijasida tadqiqotlarni amalga oshirishda kuchli raqobat muhiti shakllanadi.

Bu esa o‘z navbatida oliy ta’lim muassasalari va ilmiy tashkilotlarning ishlab chiqarish bilan uyg‘unlashishini oshirib, iqtisodiyotga raqobatbardosh va import o‘rnini bosuvchi innovatsion mahsulotlar va xizmatlarni yaratish hamda yetkazib berishdagi faolligini oshiradi.

Shuningdek, “Spin-off” korxonalar bozorda yangi turdagi talab va ehtiyojlarni yuzaga keltirish orqali iqtisodiyotni innovatsion rivojlantirishda alohida rol o‘ynaydi.

Nima uchun Spin-Off korxonalari zarur?

• Ilmiy tadqiqotlar natijalarini amaliyotga joriy etish: Universitet professorlari va talabalarining ilmiy tadqiqotlari natijasida yangi texnologiyalarni yaratadi. Spin-off korxonalari bu ixtirolarni amaliyotda qo‘llash imkoniyatini yaratadi.
• Ishlanmalarni tijoratlashtirish: Spin-off korxonalari ilmiy ishlanmalarni bozorga chiqarish va ularni tijoratlashtirish orqali iqtisodiy foyda olish imkonini beradi. Bu korxonalar nafaqat universitetlar va tadqiqot institutlariga, balki butun jamiyatga foyda keltiradi.
• Yangi ish o‘rinlarini yaratish: Spin-off korxonalari yangi biznes va texnologiyalarni rivojlantirish bilan birga, yangi ish o‘rinlari yaratish va iqtisodiy rivojlanishga hissa qo‘shadi.
• Ilmiy va amaliy bilimlarni integratsiya qilish: Ilmiy tadqiqotlari natijasida yaratilgan yangi texnologiyalar va sanoat o‘rtasidagi hamkorlikni rivojlantiradi, yangi texnologiyalarning amaliyotga tatbiq etilishi orqali ta‘lim va ishlab chiqarishning integratsiyasi kuchayadi.

Spin-Off korxonalari qanday afzalliklarga ega?

1. Ilmiy yutuqlarni tijoratlashtirish: Spin-off korxonalari ilmiy izlanishlar va ixtirolarning bozorga chiqarilishiga imkon beradi, bu esa iqtisodiy foyda va yangi mahsulotlar yaratadi.
2. Texnologiyalarni amaliyotga tatbiq etish: Yangi ishlanmalar va xizmatlar real sohalarda qo‘llanilib, ijtimoiy va iqtisodiy muammolarni hal qilishga yordam beradi.
3. Innovatsion muhitini yaratish: Spin-off korxonalari innovatsiyalarni yaratish va ularni rivojlantirish uchun qulay muhitni ta’minlaydi.
4. Global raqobatbardoshlikni oshirish: Spin-offlar yangi texnologiyalar va mahsulotlar yaratish orqali mamlakatning global raqobatbardoshligini oshiradi.

Spin-off korxonalari oliy ta’lim va ilmiy tadqiqot muassasalarining ilmiy yutuqlarini amaliyotga tatbiq etish va tijoratlashtirishda juda muhim rol o‘ynaydi. Ular nafaqat yangi innovatsion yechimlarni yaratishga yordam beradi, balki iqtisodiy va ijtimoiy rivojlanishga katta hissa qo‘shadi.