Milliy Ilmiy Portali

Bugun, 3-iyul kuni Innovatsion rivojlanish agentligi tomonidan O‘zbekiston Respublikasi Oliy Majlisi Qonunchilik palatasining Innovatsion rivojlanish va axborot texnologiyalari masalalari qo‘mitasi bilan hamkorlikda davra suhbati tashkil etildi. Unda GIIda erishilgan natijalar, indikatorlar ma’lumotlarini shakllantirish jarayonida uchrayotgan muammolar va ularni bartaraf etish yo‘llari muhokama etildi.

Davra suhbatida Innovatsion rivojlanish agentligi direktori Sh.Rajabbayev va Oliy Majlisi Qonunchilik palatasining Innovatsion rivojlanish va axborot texnologiyalari masalalari qo‘mitasi raisi I.Abdullayev, quyi palata deputatlari, mas’ul tashkilotlar va idoralar vakillari, tadqiqotchilar hamda olimlar qatnashdilar.

Ma’lumki, O‘zbekiston Respublikasi Prezidentining 2023-yil 11-sentabrdagi “O‘zbekiston – 2030” strategiyasi to‘g‘risida” PF-158-son Farmoniga muvofiq O‘zbekiston 2030-yilga  qadar Global innovatsiya indeksi (keyingi o‘rinlarda – GII)da Top-50 talik mamlakatlar ro‘yxatiga kirishi belgilangan.
 

• GII – global tadqiqot va innovatsion rivojlanish bo‘yicha dunyo mamlakatlari reytingi bo‘lib, Jahon intellektual mulk tashkiloti (WIPO) tomonidan turli korporativ va akademik tarmoq hamkorlari hamda GII maslahat kengashi bilan hamkorlikda nashr etiladi. GII 7 ta yo‘nalish va 78 ta ko‘rsatkichdan iborat va ular iqtisodiy rivojlanishning turli darajalarida bo‘lgan mamlakatlarning innovatsion rivojlanishini tavsiflaydi. Mazkur indeks ikki subindeks - Innovatsiyalarni joriy etish uchun mavjud resurslar va sharoitlar (Innovation Input) va Innovatsiyalarni joriy etishda erishilgan amaliy natijalar (Innovation Output) dan iborat.

So‘zga chiquvchilarning ma’lum qilishlaricha, 2024-yil yakuniga ko‘ra O‘zbekiston Global innovatsiya indeksi  reytingida 133 ta mamlakat orasida 83-oʻrinni egalladi. Oʻzbekiston Markaziy va Janubiy Osiyo mintaqasidagi 10 ta mamlakat ichida 4-oʻrinni egallab, innovatsiyalar sohasida milliy iqtisodiy rivojlanish darajasiga nisbatan yuqori ko‘rsatkichga erishdi.

Ma’lumot o‘rnida, 2024-yilgi reytingda mamlakatlar 78 ta indikator boʻyicha baholangan. Shunga koʻra, Oʻzbekiston uchun 40 ta indikatorda pozitsiya yaxshilandi. Shuningdek, 2024-yil reytingida O‘zbekiston uchun 2023-yilda mavjud boʻlmagan jami 10 ta indikatorlardan 8 tasi ilk bor aks ettirilishiga erishildi. Tarkibiy indikatorlarning qamrov darajasi 97,4 foizga yetkazildi (2015-yil 62,5 foiz, 2022-yil 81,4 foiz va 2023-yil 87,5 foiz).

Tadbir davomida Global innovatsiya indeksi tarkibiy indikatorlariga mas’ul vazirlik va idoralar tomonidan ma’lumotlarni shakllantirish masalasi muhokama qilindi.

Ishtirokchilar mamlakatimizning GIIda erishgan natijalari, indikatorlar ma’lumotlarini shakllantirish jarayonida uchrayotgan muammolar va ularni bartaraf etish yo‘llari, shuningdek, O‘zbekistonning xalqaro reytingdagi o‘rnini yanada yaxshilashda ishtiroki muhim bo‘lgan mas’ul tashkilotlarning mazkur yo‘nalishga oid faoliyatini ko‘rib chiqish, qonunchilik bazasini mustahkamlsh, yangi takliflar ishlab chiqish bo‘yicha kelgusida amalga oshirilishi lozim bo‘lgan vazifalar yuzasidan fikr almashdilar. Shuningdek, ishtirokchilar mavzu yuzasidan savollariga atroflicha javob oldilar.