Mazkur loyiha 2025–2027-yillarga mo‘ljallangan bo‘lib, uning doirasida O‘zbekistondagi texnoparklar faoliyatini rivojlantirish maqsadida Koreya tajribasi asosida milliy strategiya ishlab chiqilishi rejalashtirilgan. Shuningdek, Koreyaning fan va texnologiya siyosatini rivojlantirish modeli va tajribasini mahalliy texnoparklarga tatbiq etish ham ko'zda tutilgan.
Hozirda loyiha doirasida O'zbekistonlik mutaxassislar malakasini oshirish va texnoparklar bo‘yicha Koreya tajribasini o‘rganish maqsadida Innovatsion rivojlanish agentligi vakillaridan iborat delegatsiya Koreya Respublikasida xizmat safarida bo‘lib turibdi.
Dasturning birinchi kuni O‘zbekiston va Koreya o‘rtasida innovatsion hamkorlikni mustahkamlash hamda O‘zbekistonda texnoparklar va startap ekotizimini rivojlantirishda qimmatli xalqaro tajribalarni o‘rtoqlashishga bag‘ishlandi. Delegatsiya aʼzolari Koreyaning ilg‘or ilm-fan va texnologiya siyosati, texnoparklar tarixi va rivojlanishi, shuningdek, Koreya Texnoparklar Assotsiatsiyasining innovatsion ekotizimdagi o‘rni haqida bir qator mutaxassislik maʼruzalarini tingladilar.
Maʼruzachilar qatorida bu sohada xalqaro eʼtirofga ega bo‘lgan koreyalik ekspertlar — doktor Sung Chul Chung, doktor Deok Soon Yim va doktor Hyun Young Youn ishtirok etdilar.
Ma’ruzalar yakunida Koreya modelini O‘zbekiston iqtisodiyoti va geografik sharoitida qo‘llash imkoniyatlari va qiyinchiliklari, texnoparklarni barpo etish va ularni moliyalashtirishning samarali mexanizmlari, shuningdek, innovatsion infratuzilmani rivojlantirishda davlat-xususiy sheriklikning o‘rni kabi mavzularda savol-javoblar va jonli muhokamalar bo‘lib o‘tdi.
Keyingi kunlarda delegatsiyaning Seul, Cheongju, Sejong, Gyeongsan va Pohang shaharlarida joylashgan Koreyaning yetakchi texnoparklari, innovatsion markazlari hamda ilmiy-tadqiqot muassasalariga tashrif buyurish rejalashtirilgan.
