Sayxunobod tumanida innovatsion rivojlanish yo‘nalishida muhim qadam qo‘yildi. Innovatsion rivojlanish agentligi tomonidan moliyalashtirilgan “POLY TEX SIRDARYO” korxonasining “Qishloq xo‘jaligi sohalarini integratsiyalash va zamonaviy, innovasion agrolaboratoriya tashkil etish” loyihasi doirasida qishloq xo‘jaligi tizimida ilg‘or texnologiyalar joriy etilib, zamonaviy agrolaboratoriya faoliyati yo‘lga qo‘yildi. Ushbu tashabbus nafaqat tarmoq samaradorligini oshirishga, balki ilmiy-amaliy yondashuvlar orqali yangi imkoniyatlar ochilishiga xizmat qilmoqda.
Loyiha natijasida o‘nlab yangi ish o‘rinlari yaratilib, mahalliy yoshlar va mutaxassislar ish bilan ta’minlandi. Shu bilan birga, ishlab chiqarish hajmi va mahsulot sotuv ko‘rsatkichlari sezilarli darajada oshib, 2 mlrd.so'mdan ortiq sotuv shartnomalari amalga oshirildi.
Innovatsion rivojlanish agentligi ishchi guruhi Sayxunobod tumaniga xizmat safari davomida loyiha doirasida amalga oshirilgan ishlarni atroflicha o‘rgandi, natijalar tahlil qilingan holda loyihani yakunlash ishlari amalga oshirildi.
Mazkur loyiha qishloq xo‘jaligi sohalarida innovatsion yondashuvlarni keng joriy etish, resurslardan samarali foydalanish va barqaror iqtisodiy o‘sishni ta’minlash borasida Sirdaryo viloyatida amalga oshirilayotgan eng yirik va istiqbolli tashabbuslardan biri sifatida e’tirof etilmoqda.
